നിയമവിരുദ്ധ വിലനിർണ്ണയം , പക്കേജിങ്ങിൽ അറബി ഭാഷ ഒഴിവാക്കുന്നത് ; കഴിഞ്ഞ മാസം വാണിജ്യ മന്ത്രാലയം കണ്ടെത്തിയ നിയമലംഘനങ്ങളുടെ പട്ടിക പുറത്ത്
ജൂണിൽ വിപണികളിൽ വാണിജ്യ മന്ത്രാലയം കണ്ടെത്തിയ‌പ്രധാനപ്പെട്ട 10 നിയമലംഘനങ്ങളുടെ പട്ടിക പുറത്ത്. പട്ടികയിൽ ഏറ്റവും മുകളിൽ വില കൃത്രിമത്വമാണ്. അതിൽ 99 കേസുകൾ നിയമവിരുദ്ധ വിലനിർണ്ണയ രീതികളിൽ ഉൾപ്പെടുന്നു. ഇൻവോയ്‌സുകളിലും പരസ്യങ്ങളിലും തെറ്റായ വിവരങ്ങൾ നൽകുന്നു. 81 ലംഘനങ്ങൾ ഇത്തരത്തിൽ കണ്ടെത്തി. എക്സ്ചേഞ്ച്, റിട്ടേൺ നിയന്ത്രണങ്ങൾ പാലിക്കാത്തതും ഉപഭോക്തൃ സംരക്ഷണത്തെ നേരിട്ട് ബാധിക്കുന്നതുമായ 62 കേസുകൾ കഴിഞ്ഞമാസം റിപ്പോർട്ട് ചെയ്തു.
ഇലക്ട്രോണിക് സാധനങ്ങൾക്കും സേവനങ്ങൾക്കും, പാക്കേജിംഗിലോ പ്രദർശന മേഖലകളിലോ അറബിയിൽ ഉൽപ്പന്ന വിശദാംശങ്ങൾ നൽകുന്നത് വിതരണക്കാർ അവഗണിക്കുന്നതും കുറ്റമാണ്. 52 നിയമലംഘനങ്ങൾ ഇങ്ങനെ രജിസ്റ്റർ ചെയ്തു. ഉൽപ്പന്ന വിവരങ്ങളോ വിലനിർണ്ണയമോ സംബന്ധിച്ച് വഞ്ചനാപരമായ പരസ്യം നൽകുന്നതും തെറ്റാണ്. 46 കേസുകളാണ് ഇങ്ങനെ റിപ്പോർട്ട് ചെയ്തത്. കൂടാതെ, ഔദ്യോഗിക ലൈസൻസില്ലാതെ പ്രവർത്തിക്കുന്ന 40 ബിസിനസുകളും ഭക്ഷ്യ ഉൽപ്പന്ന ലേബലുകളിൽ ഉത്ഭവ രാജ്യം ഒഴിവാക്കിയതിന് 40 നിയമലംഘനങ്ങളും വകുപ്പ് രേഖപ്പെടുത്തിയിട്ടുണ്ട്. വിപണിയിലുടനീളം സുതാര്യതയും ഉത്തരവാദിത്തവും നടപ്പിലാക്കുന്നതിനും ഉപഭോക്തൃ താൽപ്പര്യങ്ങൾ സംരക്ഷിക്കപ്പെടുന്നതിനുമാണ് വാണിജ്യ മന്ത്രാലയത്തിന്റെ പരിശോധന.
Comments (0)