കുവൈത്ത് സിറ്റി: ഡ്രോൺ ഉപയോഗിച്ച് ജയിലിലേക്ക് മയക്കുമരുന്ന് കടത്താൻ ശ്രമിച്ച രണ്ടുപേർ പിടിയിൽ. ജനറൽ ഡിപാർട്ട്മെന്റ് ഫോർ ഡ്രഗ് കൺട്രോളിന്റെ പ്രാദേശിക ആന്റി-നാർക്കോട്ടിക്‌സ് യൂനിറ്റാണ് പ്രതികളെ പിടികൂടിയത്. ഫിൻതാസ്, സഅദ് അൽ അബ്ദുള്ള എന്നീ പ്രദേശങ്ങളിൽ നിന്നാണ് ഇരുവരെയും അറസ്റ്റ് ചെയ്തത്. വാട്സാപ്പ് ചാനലിൽ അംഗമാകാൻ ലിങ്ക് ക്ലിക്ക് ചെയ്യുക
രഹസ്യ വിവരങ്ങളെ തുടർന്ന് നാർക്കോട്ടിക്‌സ് വിഭാഗം നടത്തിയ സൂക്ഷ്മമായ നിരീക്ഷണത്തിലാണ് സംഘം വലയിലായത്. പ്രതികൾ ഡ്രോണുകൾ ഉപയോഗിച്ച് സെൻട്രൽ ജയിലിനുള്ളിലെ ഒരു തടവുകാരന് മയക്കുമരുന്ന് എത്തിക്കുകയായിരുന്നുവെന്ന് അന്വേഷണത്തിൽ വ്യക്തമായി.
സാമ്പത്തിക ലാഭത്തിന് വേണ്ടിയായിരുന്നു ലഹരിക്കടത്ത്.മയക്കുമരുന്ന് പോലുള്ള സാമൂഹ്യ വിപത്തുകളെ ഇല്ലായ്മ ചെയ്യാൻ ശക്തമായ നടപടികൾ സ്വീകരിക്കുമെന്ന് ആഭ്യന്തര മന്ത്രാലയം അറിയിച്ചു. സംശയാസ്പദമായ കാര്യങ്ങൾ ശ്രദ്ധയിൽപ്പെട്ടാൽ അധികാരികളെ അറിയിക്കണമെന്നും മന്ത്രാലയം അഭ്യർഥിച്ചു.